Itikaf Ke Masail In Urdu عورت کے اعتکاف کے مسائل Aurat Ka Itikaf K Masail Itikaf K Nawafil In Urdu Itikaf For Females In Urdu

Itikaf Kay Masail aur Sawab 

Ramzan Mein Itikaf Ki Fazilat Itikaf Kitne Din Ka Hota Hai

itikaf Ka Matlab itikaf Kya Hai in Urdu

Itikaf k lughvi maani thehrne k hain islami istalah mein duniya k tamam kaam aur karobar chor kar Allah Taala ki ataat aur uski raza hasil karne k liye ramzan shareef k akhri ashra mein masjid k aik kona mein bethne ko itikaf kehte hain. Nabi Sallaho Alaihe Wa Alihi Wasallam har saal 10 din itikaf kiya karte thy wisaal wale saal Aap Sallaho Alaihe Wa Alihi Wasallam ne 10 din ki bajaye 20 din itikaf farmaya (Sahih Bukhari wa Sahih Muslim, Sahiheen, Mutafqan Aleh)

Itikaf mein kasrat e nawafil, tilawat e Quran e Majeed, Zikr e ilahi aur Darood shareef parhne mein mashgool rehna chahiye. Itikaf ki bari fazeelat i hai. Aap Sallaho Alaihe Wa Alihi Wasallam ka irshad hai jis ne 10 din itikaf kiya usko 2 Hajj aur 2 Umrah ka sawab milega. (Bayhaqi)
Itikaf karne wala bagair kisi majburi k masjid se bahar na nikle albata qaza e hajat aur namaz e jumma k liye nikalna jaiz hai. Mard ki tarah aurat bhi masjid mein itikaf beth sakti hai. Moatkif 21 ramzan ul mubarak ko subah ki namaz parh kar itikaf wali jagah mein dakhil ho aur chand dekh kar bahar nikle.

Aurtain Bhi Masjid He Mein Itikaf Bethen Itikaf Ka Tarika In Urdu For Females

Itikaf Ka Tarika Aurat K Liye In Urdu Khawateen Ka Itikaf Ka Tarika In Urdu

Ramzan ul Mubarak k akhri ashra mein baaz jagah Ahnaf ki dekha dekhi auraten apne gharon mein itikaf bethti hain halanky jaye itikaf ghar nahi masjiden hain isliye auraton ka apne gharon mein itikaf bethna sahi nahi hai. Auraten sirf aisi masjidon mein itikaf bethen jahan auraton k liye har cheez ka mardon se alag intezam ho aur kisi kisam ka fitna o fasad ka andesha na ho basurat e degar inka itikaf bethne se ijtinab karna zyada behtar hai jesa k Allah Taala ka irshad hai.
Tarjuma:- Jab tum masajid mein itikaf bethe ho auraton se mubashrat na karo.
Hanafiyon k mashoor molvi Muhammad Zakariya Kandhlawi raqamtaraz hain.
" Aurat k liye apne ghar mein itikaf karna chahiye. (Fazail e Ramzan)
Molana Rifat Qasmi Mudarris Darul Uloom Deoband Muarf Alhadees jild no.1 safah no. 119 k hawala se likhte hain.
"Azwaj e Mutahirat apne hujron mein itikaf farmati thin aur khawateen k liye itikaf ki jagah unke ghar hain unke ghar wahi jagah jo unhon ne namaz k liye muqarrar kar rakhi ho. Agar ghar mein koi khas jagah muqarir na ho to itikaf karne wali khawateen ko aisi jagah muqarar kar leni chahiye.
Imam Muhammad Bin Ismail Bukhari R.A Al Mutufi ne apni kitab Sahih Bukhari jild no.1 safah no. 172 par aik baab bayen alfaz munaqid kiya hai.
Yani ramzan ul mubarak k akhri ashra mein itikaf bethne ka bayan aur ye k tamam jamya masajid mein itikaf ho sakta hai kyon ki irshad e baari taala hai.
" Aur tum jab masajid mein itikaf betho to raat ko apni auraton se mubashrat na karo ye Allah Taala ki hadain hain inke qareeb bhi na jana Allah Taala isi tarah apni ayaat logon se bayan farmata hai takay log Taqwa ikhtiyar karen.
(Baqiya Hashiya)
(Mukamal o Mudlil Masail e itikaf safah 25) Allama Alim Faqri Hanafi raqamtaraz hain.
" Auraton ka itikaf ghar mein hoga masajid mein nahin " (Rohani Itikaf Safah 20)
Baaz Ahl e Hadees ulma ne bhi auraton ko apne gharon mein itikaf bethne ki ijazat de rakhi hai jesa k tajaliyat e ramzan mein 125 par marqoom hai.
"Note: Auraten badstaoor gharon mein itikaf karen."
Mahanam Sirat e Mustaqeem Birmingham Bartaniya jild no.13, shumara 4, safah 23 par marqoom
16: Auraton k liye gharon mein itikaf karna afzal hai.
Faida jaleela:-

Is se saaf zahir hai k agar itikaf masjid k ilawa kisi dusri jagah bhi jaiz hota to Quran e Majeed mein ye masala bayan na kiya jata k masjid mein itikaf k waqt mubashirat mana hai kyon ki ye itikaf k munafi hai is se maloom hua k itikaf masajid mein he hota hai.
Fatah ul Bari jild 4 safah 319 umdah tul qari jild no. 5 safah 373 aur qustalani jild no.1 safah no. 227 k mutabiq Bukhari Shareef k tarjuma Al Baab se Imam Muhammad bin Ismail R.A Bukhari Al Matufi ki gharz ye hai kay: itikaf k sahih hone ki manmjila dusri mtalooba sharait k aik lazmi sharat masjid bhi hai aur ulma e karam ka is par itefaq hai. Isiliye Rasool Allah Sallaho Alehi Wa Aalhi Wasallam ne apni zindagi mein har saal ramzan ul mubarak mein he itikaf kiya hai. Aik martaba kisi safar ki wajah se choot gaya to agle saal 20 din itikaf farmaya, ghar mein aik martaba bhi itikaf na kiya.

Itikaf Jamia Masjid Mein Masnoon Hai

Hadees ka tarjuma
Al Jamiya Al Shoaib il imaan jild no.7 safah no. 521, raqam 3676, Abu Dawood jild no.1 safah no. 342 Mishkat jild no.1 safah 183
Umm ul Momineen Hazrat Ayesha Siddiqa R.A farmati hain Sunnat e Nabwi S.A.W.W yehi hai k itikaf nahi hota magar jamiya masjid mein.
Hazrat Ali R.A ne farmaya k itikaf nahi hota magar jamia masjid mein.
Al Hasil:- Is mein koi shak nahi k Amma Aisha Siddiqa R.A k farman ko Usool e Hadees ki ru se bil itefaq Muhaddiseen Azaam marfu hadees ka darja hasil hai jesa k hashiya mein wazahat kar di gayi hai goya k Rasool Allah S.A.W.W ne khud farmaya hai k " Nahi itikaf magar jamia masjid mein" Jamia masjid wo hai jis mein 5 waqt ki namaz bajamaat ka ehtamam ho bas aisi masjid mein itikaf karna masnoon hai.

Ummhat ul Momineen Ka Masjid Mein Itikaf Woman Itikaf Rules For Females In Urdu

Umm ul Momineen Hazrat Ayesha Siddiqa R.A se riwayat hai k beshak Nabi S.A.W.W ne itikaf kar irada kiya. Jab masjid mein itikaf ki jagah pohnche to wahan kayi khemy lage hue dekhe ye khemy Hazrat Hafsa R.A aur Hazrat Zainab R.A k khemay thy. Nabi S.A.W.W ne farmaya, tum is mein in ki neki samjhti ho phir Aap S.A.W.W wapis chale gaye aur itikaf nahi bethe yahan tak k shawwal k ashre ka itikaf kiya.
Hazrat Ayesha Siddiqa R.A. se riwayat hai k Rasool Allah S.A.W.W Ramzan k akhri ashra mein itikaf karte thy main aap k liye Masjid mein khaima laga deti to Aap S.A.W.W 21 ramzan ko fajar k baad is mein tashreef le jate Hazrat Hafsa R.A ne Hazrat Ayesha Siddiqa R.A se apne liye khema lagane ki ijazat mangi unhone ijazat de di to Hazrat Hafsa R.A ne bhi masjid mein apne liye aik khaima laga liya jab Hazrat Zainab R.A ne dekha to unho ne bhi khaima laga liya.
Jab Rasool Allah S.A.W.W ne subah ki namaz parh kar itny khemy dekhe to farmaya ye khemy kis liye hain? Aap S.A.W.W ko bataya gaya to Aap S.A.W.W ne farmaya k tum isay inki neki samjhti ho yani ye to tum dekha dekhi kar rahi ho chanacha Aap S.A.W.W ne is mahine itikaf chor diya aur phir Shawwal k ashra ka itikaf kiya. (Sahih Bukhari wa Sahih Muslim)
Hafiz Ibn e Hajar R.A aur Allama Aini R.A Ka Fesla
Shareh Bukhari Imam Ahmed Bin Ali R.A bin Hajar Asqalani R.A Al Matufi aur Allama bin Ahmed Aini Al Matufi raqamtaraz hain.

Mazkura bala hadees sahihah is iski sharah se roz e roshan ki tarah ayan hai k sehat e itikaf k liye masjid sharat hai warna Aap S.A.W.W apni Azwaj e Mutahirat R.A ko masjid mein itikaf ki ijazat he na dete, kyon ki auraton ko to gharon mein bhi parday ka hukam hai pas agar sehat e itikaf k liye masjid mein theharna sharat na hota to Aap S.A.W.W apni Azwaj e Mutahirat R.A ko ko kabhi bhi masjid mein itikaf ki ijazat ne dete aur na phir inke tarz e amal ki bina par inhen mana he karte balke farmate k tumhare liye yehi kafi hai k tum apne apne gharon mein itikaf betho.

Imam e Novi R.A Ka Faisla

Shareh Muslim Imam Yahya R.A. Bin Sharaf Novi Al Matufi raqamtaraz hain yani ye Ahadees is baat ki wazeh daleel hain k itikaf masjid k ilawa kisi dusri jagah sahi nahi kyon ki Nabi Kareem S.A.W.W aur Aap S.A.W.W ki Azwaj e Mutahirat R.A. aur Sahaba e Karam R.A. masjid mein he itikaf kiya karte thy halanky masjid k iltizam mein kafi diqqat ka samna hota hai. Agar ghar ki masjid mein itikaf jaiz hota to Sahaba e Karam R.A aik dafa zaror aisa karte khas tor par auraten to gharon mein itikaf kartin kyon ki mardon ki ba nisbat aurten gharon mein itikaf ki zyada zaroorat mand thin.
Aur ye jo hum ne zikar kiya hai k sehat e itikaf k liye masjid shart hai iske ilawa kisi dusri jagah itikaf sahi nahi hai ye Imam Malik R.A, Imam Shafi R.A, Imam Ahmad R.A, Imam Dawood R.A aur Jamhoor e Muhaddiseen Azam R.A waghera ka mazhab hai is mein mard aur aurat dono barabar hain.
Umm ul Momineen Umme Salma R.A Ka Rasool Allah S.A.W.W Kay Sath Masjid Mein Itikaf
Hazrat Ayesha Siddiqa R.A farmati hain k Rasool Allah S.A.W.W k sath aap ki biwiyon mein se aik aurat Sunan Saeed R.A bin Mansoor R.A ki riwayat k mutabiq Hazrat Umm e Salma R.A ne Halat e Istihaza mein itikaf kiya isay kabhi surkh aur kabhi zard khoon ata tha aur khoon ki kasrat ki wajah se basa auqat hamen uske neeche tabaq rakhna parta hai tha aur wo is halat mein he namaz ada karti thin.
Al Hasil:- Mazkura bala hadees e sahiha se darj zail 3 fawaid samne aye hain:-
1. Mard ki tarah aurat bhi masjid mein he itikaf kare.
2. Mustahaza aurat bhi masjid mein itikaf kar sakti hai.
3. Agar aurat k liye ghar mein itikaf karna afzal ya jaiz hota to Nabi Kareem S.A.W.W apni is bimar biwi ko bilkhasoos aisa karne ka hukam zaror dete.
Ye hadees Ahle Hadees k muaqaf ki aisi thos aur wazeh daleel hai k jis ki koi taveel nahi ki ja sakti baharhal Umm ul Momineen Hazrat Umm e Salma R.A ka shauq e ibadat, unka mustahza hona, is marz k bawajood unka Rasool Allah S.A.W.W k sath masjid mein itikaf karna is baat ka bayen saboot hai k aurat ka itikaf bhi ghar mein nahi balke masjid mein he hoga.
Mazkura hadees k zail mein auon ul mabood jild no. 2 safah no.311 aur neel alwatar jild no.4 safah no. 151 par marqoom hai.

Hadees ka tarjuma:- Ye hadees 4 masail ki daleel hai awwal ye k mustahza aurat masjid mein qayam kar sakti hai. Doom ye k mustahza aurat ka masjid mein itikaf sahi hai. Soom ye k mustahza ki namaz bhi sahi hai. Chaharam ye k aurat ka masjid mein be wazu hona bhi jaiz hai jabky talwees ka khadsha na ho aur daim al hadas aur jis ka khoon rista rehta hai aur wo bhi is qabeel se hain.
Hasil e Kalam:- Satoor e bala mein Quran e Majeed aur ahadees sahiha aur inki sharooh se ye amar roz e roshan ki tarah wazeh se wazeh tar ho gaya ha k muatkif k liye masjid shart hai is mein mard aur aurat dono barabar hain. Lehaza auraton ka itikaf bhi masjid he mein sahih hai ghar mein sahi nahi jesa k Umhat ul Momineen R.A ne Nabi S.A.W.W ki mubarak zindagi mein aur Aap S.A.W.W ki wafat k bad bhi masjid he mein itikaf kiya. Ulama e Ahnaf ka ye kehna k auraton ka itikaf ghar mein hoga masajid mein nahi ya aurat aurat k liye apne ghar mein aitkaf karna chahiye waghera waghera ye sirf un ka qiyaas hai jo bilkul ghalat aur Quran e Majeed aur Ahadees e Sahiha k sara sir khilaf hai.

Ikhtitam e Itikaf:- Jab shawwal ka chand nazar aa jaye to mutakif ka itikaf khatam ho gaya ab wo mutakif itikaf gah se bahir nikal kar ghar rawana ho jaye. Allah Taala ka shukar ada kare k haqeer nazrana Bargah e ilahi mein qabool ho. Aaj kal bara riwaaj ho gaya hai k mutkif ko bary ahtmam k sath nikalte hain noton aur pholon k haar pehnate hain aur ba qaida jaloos ki shakal mein isay ghar chor kar aate hain so wazeh ho k ye tamam baatein ghair sharai hain jinka koi saboot nahi inse ijtinab karna nehayat zarori hai.

Roza Rakhne Kay 10 Aham Fawaid روزے کا اجر Roza Rakhne Ke Kya Fayde Hain Roza Rakhne Ke Fayde In Hindi

Roza Rakhne Ke Fawaid aur Iske Asraat

Roza Rakhne Se Kya Fayda Hota Hai Roza Kyon Rakhte Hain?

Roza Rakhne Ke Fayde in Urdu Ramadan Fasting Benefits In Hindi

 Allah k naamon mein se aik naam hakeem hai aur hakeem wo zaat hoti hai jo hikmat se mutsif ho, aur hikmat kehte hain kisi kaam mein maharat hasil karne ko, aur kaam ko iske moka o mehal k mutabiq karne ko, Allah Taala k is naam ka taqaza hai k har cheez ko Allah Taala ne apni hikmat balgha k teht peda aur mashru kiya jis ne iski hikmat ko jaan liya so jaan liya, aur jo is ki hikmat ko nahi samjh paya to ye iski apni kam ilmi hai, aur wo roza jis ko Allah Taala ne apne bandon par farz qarar diya hai is mein azeem hikmatein aur beshumar fayde hain jin mein se chand aik ka tazkirah kiya jata hai.

Roza Rakhne Kay 10 Zabardast Faiday

1. Roza aik aisi ibadat hai jis k zariye banda apni mehboob tareen cheezon ko jesy khana peena aur jamaa ko iski fitri mohabbat k bawajood chor kar rab ka qurb hasil karta hai takay apne rab ki raza, uski khushnudi aur jannat hasil kar sake, istarah rozadar ka apni mehboob tareen cheezon par rab ki raza o pasandeedgi ka aur akhirat ko duniya par tarjeeh dena wazeh hota hai.
2. Roza taqwa ka zariya hai basharatyky rozadar apne roze ko wajbaat k sath ada kare,
farman e bari taala hai:

Tarjuma:- Aye imaan walo! Tum par roze rakhna farz kiya gaya jis tarah tum se pehle logon par farz kiye gaye thy takay tum taqwa ikhtiyar karo." (Surah Al Baqarah Ayat No.183)
Rozadar ko taqwa ikhtiar karne ka hukm hai aur taqwa Allah Taala k ahkamat manne aur uski mana karda cheezon se bachne ka naam hai, aur roza rakhne ka sab se bara maqsad yehi hai, roza rakhne ka maqsad hargiz ye nahi hai khana peena aur sohbat tark karwa kar rozadar ko aziyat aur takleef pohnchai jaye.
Farman e Nabvi S.A.W.W hai " Jo shakhs roza rakh rakh kar jhoot bolna, us par amal karna aur jahalat tark na kare to Allah ko iske bhooke pyase rehne ki koi zaroorat nahin"

3. Roza nafs ki tarbiyat, ikhlaq ko tehzeeb aur rozadar k andar isteqamat ki sift paida karta hai, roza ka aik tehzeebi paigham hai jis k gehre asrat musalmano k ikhlaq par parte hain, isitarah ye roza dar k andar khauf e ilahi ki sift bhi peda kar deta hai, ye khauf iske nafs ki nigrani karta rehta hai aur andar se zabt nafs peda karta hai, phir aik roza dar musalman se jo amaal saadar hote hain wo iske khof k tabay hote hain.

Kya aap ne kabhi aisa rozadar dekha hai jo apne rab k sath sach to bole aur logon k sath jhoot bole? Jo apne roza mein mukhlis ho aur muashra mein munafiqat peda kare? Ikhlas aisi akai hai jis ko taqseem nahi kiya ja sakta aur bilashuba roza ki kohan ki choti aur mamla ki jar Allah k sath ikhlas hai? to lehaza jo shakhs apne rab k sath mukhlis hoga mahal hai k wo dusro ko fareb, khayanat aur dhoka de aur mahal k wo chori kare aur takleef de agar is se koi ghalt kaam saadar ho he jaye to foran palatta hai raju karta hai mazrat karta hai aur had darja sharminda hota hai.
Roza ikhlaq ko jorne aur andar se mazboot buniyadon par khara karne k asbab mein se aik bunyadi sabab hai isliye k zahri khubsurti koi faida nahi de sakti jab tak andar se bunyad mazboot aur pukhta na ho isliye k rozadaron k ikhlaq, sabit qadmi, istamra aur duwam aur taraqi jesy siffat liye hue hote hain isliye k andar or bahir se iski mukamal hifazat ho rahi hoti hai.

4. Roza insan ko ghalat adaat ki hukmarani se chutkara dilata hai jo shakhs kisi buri adat ka qaidi ho jaye wo ye samajhta ho k is galat aadat se chutkara hasil nahi kar sakta aur na he wo is se azad hone ki taqat rakhta hai to isay chahiye k wo roza rakhe, isliye hum dekhte hain k aadmi roza rakh kar apni aadat qulli aur qatai taur par badal sakta hai, iske bad wo ye samajh jata hai k iske liye apne nafs ko in aadat ki bandish se azad karna sehal aur asan hai jo adaat hamesha se iske liye qalaq aur pareshani ka sabab bani rahin.

5. Roza mein Allah Azzawajal ki ibadat aur tabyadari ka saboot hai isliye roza musalmano ko sachi ibadat o bandgi ki tarbiyat karta hai chanacha jab raat aati hai to rozadar apne rab k is farman ki tameel mein

Tarjuma:- Tum khate peete raho yahan tak kay subah ka safed dhaga siyah dhagay se zahir ho jaye." Khata aur peeta hai isliye roza dar k liye sehri aur iftari kay waqt khana mustahab qarar diya gaya hai aur saum o saal ko makroh jana gaya isliye in aukat mein khana peena ibadat e ilahi qrar paya aur jab subah sadiq talu hoti hai to Allah Taala k is hukam Tarjuma: Phir raat tak rozy ko pura karo" ki tameel mein khane peene aur roza ko tor dene wali dusri cheezon se ruk jata hai is tarah aik musalman Allah Taala k liye mukamal abudiyat o bandgi par tarbiyat pata hai.

• Roza Rakhne Ki Niyat Karne Ka Tarika روزہ رکھنے کی نیت کرنے کا طریقہ

6. "Roza" gunahon ka kaffara hai isliye k nekiyan gunahon ko mita deti hain aur roza apne andar bohat si nekiyan samoye hua hai jesa k Allah ka farman hai
Tarjuma: Nekiyan gunahon ko mita deti hain (Surah Hood Ayat No.114)

Aur Aap S.A.W.W ka farman hai " Aadmi apne ehl o ayal maal o minal aur parosi ki wajah se jin gunahon ka shikar hota hai Namaz, Roza aur Sadqa inke liye Kaffarah ban jate hain.
Yani bande se jo ghaltiyan apne ahl o eyal k haq mein ho jati hain jesy sakht baatein, aziyat dena ya kisi kisam ki kotahi, ya parosiyon k haq mein jo ghaltiyan ho jati hain jesy qauli faili ziyadtiyan ya maali ghaltiyan ye sab ki sab aur iske mushaba tamam chote gunah Namaz, Roza aur Sadqa ki barkat se khatam ho jate hain.

7. Roza musalmano ko sabr o tahammul aur mushaqat bardasht karne ka aadi banata hai isliye k roza, rozadar ko pasandeeda aur marghoob cheezon aur khuwahishat ko tark karne par amadah karta hai aur khwahish nafs par qaabu pana intehai mushkil kaam hai isliye k roza mein sabar ki teeno qismen payi jati hain. Allah ki ata'at par sabar karna, Allah ki taraf se haram ki gayi cheezon par sabar karna, Allah k iqdar yani qaza o qadar par sabar karna, jab ye teeno kismen banda e momin k andar jama ho jayen to ye Allah k hukam se isko Jannat mein dakhila k bais banegi. Irshad e Rabbani hai:- Tarjuma:- Sabar karne walon he ko inka pura pura beshumar ajar diya jata hai" (Surah Al Zumar Ayat No.10)

8. Roza duniya aur akhirat mein saadat wa naik bakhti ka sabab hai farman e Nabvi S.A.W.W hai
" Rozadar k liye 2 khushiyan hai aik khushi to iftar k waqt aur aik khushi apne rab se mulaqat k waqt"
Momin ko iftar k waqt jo khushi hasil hoti hai ye iski saadat o lazzat ki aik jhalak hai jo duniya mein momin insan Allah Azzawajal k taqwa aur uski ataat k sabab mehsoos karta hai aur yehi haqeeqi saadat hai aur ye khushi momin ko 2 tarikon se hasil hoti hai.

Pehla Tarika:- Ye hai k Allah Taala ne rozadar k liye us waqt khana peena mubah aur jaiz qarar diya hai is mein koi shak nahi k nafs ko khane peene ki chahat hoti hai tabhi to rozadar aadmi in dono cheezon se ruk kar Allah ki ibadat bajalata hai.
Dusra Tarika:- Allah Taala ne usko us din ka roza rakhne aur is ibadat ko mukamal karne ki taufeeq di hai.
Sab se bari khushi rozadar ko us waqt hasil hogi jab wo akhirat k din Allah Taal se mulaqat karega. Allah Tabarak wa Ta'ala iske roze ka sab se bara badla is shakal mein dega k iska roza iske haq mein Shafaat karega aur wo Baab Ur Rayyan k rastay Jannat mein pohanch jaye ga.

9. Roza se Imaan barhta hai aur bohat sari ibadat ki baja awari mein jesy Namaz, Tilawat e Quran, Zikr e ilahi, Sadqa o Khairat, Dua o Istighfar aur Tauba karne mein bande ki madad karta hai, aur nafs ko haraam kaamon mein parne se rokta hai to Roza in azeem nekiyon mein se hai jo buraiyon ko khatam kar deta hai.

10. Roza ka aik muashrti faida ye hai k is mein daulatmand aur faqeeron aur khas o aam k darmiyan maswat hai aur ye logon mein aik Ummat k afrad hone ka ehsaas bedaar karta hai chanacha sab k sab aik he waqt mein khate hain aur aik he waqt mein roza rakhte hain. Neez maaldaar shakhs ko Allah ki naimaton ka ehsaas dilata hai chanacha wo faqeer aur zaroratmand afrad se hamdardi karta hai neez roza rakhne ki barkat se shaitan k behlawe kam ho jate hain roza society mein taqwa peda karne ka bais hai aur is se logon k bahmi taluqat mazboot ho jate hain.